Galdera egokia Nola mozorrotu zara? da.

Bestetik, -z mozorrotu (indioz mozorrotu) ala mozorrotu (indio mozorrotu) egituretako zein erabili den (erabili bada) jakiteko Orotariko Euskal Hiztegiko datuak ikusita, gaur egunera arte, ez da aurkitu -z mozorrotu egituraren lekukotasunik batere euskarazko tradizio idatzian, eta horregatik hobetsi zuen Gramatika batzordeak -Ø mozorrotu egitura 1997an.

Eta hobetsi zuen -z mozorrotu bezalakoak berri samarrak direlako eta euskarak horren ordez beste egitura batzuk erabili izan dituelako, hala nola indio jantzita, indio jantzian, indio mozorroan, indio arropetan (Iparraldean) eta abar. Mozorrotu aditza erabili izan da literaturan, baina bakarrik agertzen da gehienetan: mozorrotuta joan zen kalera.

Egia da gaur egungo erabileran asko ugaldu dela -z mozorrotu egitura; Lexikoaren Behatokia eta beste zenbait corpusetako datuetara baldin bagoaz, nabarmena da ugaltze hori. Euskaltzaindiaren Hiztegia osatzeko, lehenagoko tradizioko datuak (OEH) eta gaur egungoak erabili ziren, eta, horregatik, itsaslapurrez mozorrotu (= indioz mozorrotu) egitura ere ontzat eman zen.