Idazkera: ç (c hautsia)

Galdera

Antzinako euskal testuetako ç hizkiaren ordez, zein letra erabili behar da?

Erantzuna

Euskaltzaindiaren 17. arauak hauxe dio, besteak beste: <ç (c hautsia), q, v, w eta y, ohiko euskal hitzak idazteko erabiltzen ez diren arren, kanpotar izenak transkribatzeko beharrezkoak direlarik, euskal alfabetoan sartzen dira>>.
Antzinako euskal testuetan agertzen den ç (c hautsia) egungo euskal grafian ematerakoan, oro har, Euskaltzaindiaren Hiztegi Batua hartu behar da eredutzat, aldian aldiko baliokideak (z, tz, ...) erabiliz. Adibidez:
- XVI. mendeko Milia Lasturkoaren eresia delakoan ageri diren çauria, lur oça, doçu grafien ordezkoak zauria, lur hotza, dozu dira.
- XVI. mendeko Joan Perez Lazarraga delakoaren testuetan ageri diren çara, çu, doçu, naucaçu grafien ordezkoak zara, zu, dozu, naukazu dira.
- XVII. mendeko Axularren Gero delakoan ageri diren çatçaizquit, çait, çutçaz grafien ordezkoak zatzaizkit, zait, zutzaz dira.
- Elizanbururen Ikusten duzu goizean abestian ageri diren heçurrik, çait, duçu grafien ordezkoak hezurrik, zait, duzu dira.

Data: 20130214
Erantzulea: Joxe Ramon Zubimendi, JAGONETen arduraduna

Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.