Gaur, maiatzaren 13an, Bilboko Artazu Goikoko Iraleko irakasle talde batek Euskaltzaindia bisitatu du. Aritz Abaroa EHHA egitasmoko teknikariaren eskutik, taldeak egoitza ikusi eta Akademiaren zein euskararen historiari buruzko informazioa jaso du.
Ohi bezala, bisita bi zatitan banatu da: batetik, euskara eta Euskaltzaindiaren historiaz hitz egin die Abaroak; eta bestetik, egoitzaren lekurik esanguratsuenak -Osoko bilkuren aretoa eta Azkue Biblioteka, esaterako- barrutik erakutsi die.
Bisita hauen xede nagusia Euskaltzaindiaren lana ezagutaraztea da. Hona hemen jorratzen diren gaietariko batzuk:
- Euskararen jatorria, honen gaineko teoria desberdinak eta euskara idatziaren lehen urratsak.
- Akademiaren historia: Euskaltzaindiaren helburu nagusiak; Euskaltzaindiaren sortzea: aitzindariak, 1918ko Oñatiko biltzarra eta lehen euskaltzainak; Euskaltzaindia gerra garaian eta gerra osteko urteetan; euskara normalizazioaren bidean.
- Gaur egungo Akademia: erakundearen erabakiguneak: Zuzendaritza eta Osoko bilkura; Euskaltzaindiko batzorde, egitasmo eta lantaldeak; Euskaltzaindiko zerbitzuak.
- Euskaltzaindiaren webgunea eta bertan aurkitu ditzakegun tresnak (EODA, OEH, EHHA...).